Murad Buildings ekspertlarining ARCHICA Central Asia 2026 ko‘rgazmasidagi ishtiroki me’morchilik, developerlik va huquqshunoslik tutashgan nuqtada kasbiy muloqotni rivojlantirishga qo‘shilgan muhim hissa bo‘ldi. Har yili yetakchi me’morlar, developerlar, urbanistlar va davlat tuzilmalari vakillarini bir yerga to‘playdigan ushbu forum Markaziy Osiyoda shahar muhitining kelajagini muhokama qilish uchun asosiy maydon vazifasini o‘taydi.
ARCHICA Central Asia — shunchaki sohaviy tadbir emas, balki shaharni qayta loyihalash, renovatsiya qilish va boshqarishga doir yangi yondashuvlarni shakllantiradigan strategik platforma. Unda asosiy e’tibor barqaror rivojlanish, xalqaro standartlarni integratsiya qilish, texnologik innovatsiyalar va hayot uchun sifatli muhit yaratishga qaratilgan. 2026-yilgi forum dasturida me’morchilik faoliyatini huquqiy tartibga solish masalalariga alohida urg‘u berilishi bozorning yetukligini hamda tizimli yechimlarga bo‘lgan ehtiyoj ortib borayotganini ko‘rsatadi.
Tadbirning ishbilarmonlik dasturi doirasida Murad Buildings ekspertlari “Me’morchilikdagi o‘yin qoidalari: mualliflik huquqining yuridik himoyasi, renovatsiyaning huquqiy jihatlari va obyektlarni foydalanishga topshirish” nomli sessiyada ma’ruza o‘qib, developerlik loyihalarini muvaffaqiyatli amalga oshirish asosida yotgan huquqiy mexanizmlarni yoritib berdilar.
Ma’ruzachilar orasida kompaniyaning yuridik boshqarmasi rahbari Roman Reshetnyak ham bor. U huquqshunoslik va developerlik sohalarida 12 yildan ortiq tajribaga ega bo‘lib, O‘zbekistondagi birinchi osmono‘par bino — “Tashkent City”dagi NEST ONE hamda Navoiy viloyatidagi yirik sanoat majmualari kabi yetakchi loyihalarning amalga oshirilishida huquqiy yordam bergan. Uning tajribasi obyektning butun hayotiy siklini — huquqiy asosni ishlab chiqishdan tortib, foydalanishga topshirishgacha bo‘lgan jarayonni qamrab oladi.
Roman Reshetnyak o‘z nutqida O‘zbekiston qonunchiligidagi renovatsiyani tartibga solish va obyektlarni foydalanishga topshirishni takomillashtirishga qaratilgan yangiliklarga alohida to‘xtalib o‘tdi. U loyihani malakali huquqiy ta’minlash shunchaki rasmiyatchilik emas, balki uning investitsiyaviy barqarorligi va uzoq muddatli qiymatining asosiy omili ekanligini ta’kidladi.
Shuningdek, sessiyada Murad Buildings’ning shartnomaviy va sud-da’vo ishlari bo‘limi rahbari Emil Jemaledinov ham ma’ruza o‘qidi. Uning 12 yildan ortiq ish tajribasi bo‘lib, developerlik hamda madaniy merosni saqlash bilan bog‘liq loyihalarda ishtirok etgan.
Emil Jemaledinov qurilish, huquqiy qo‘llab-quvvatlash, shuningdek, muhim madaniy meros obyektlarini muhofaza va restavratsiya qilish sohalarida ekspert. Sessiya doirasida u loyihani amalga oshirishning barcha bosqichlarida renovatsiya va xavfsizlikni ta’minlash masalalariga batafsil to‘xtaldi.
Murad Buildings ekspertlari ARCHICA Central Asia 2026 ko‘rgazmasida ishtirok etishi kompaniyaning nafaqat developer, balki bozorning kasbiy me’yorlarini shakllantirishdagi faol ishtirokchi sifatidagi strategik o‘rnini tasdiqlaydi. Bugungi kunda “o‘yin qoidalari”ni tushunish hamda huquqiy baza bilan tizimli ishlash vaqt sinovidan o‘tadigan va qonuniy himoyalangan me’morchilikni yaratishning ajralmas qismiga aylanmoqda.
